ఇందిరమ్మ ఇండ్లకు శంకుస్థాపన.. ఖాతాల్లో డబ్బులు పడేది అప్పుడే..! తెలంగాణ ప్రజలకు రేవంత్ రెడ్డి సర్కార్ భారీ శుభవార్త వినిపించింది. ఎన్నికల్లో ఇచ్చిన హామీ మేరకు.. నిరుపేదల సొంతింటి కల నెరవేర్చేందుకు ప్రభుత్వం నడుం బిగించింది. ఇందులో భాగంగా.. ఇప్పటికే ఇందిరమ్మ ఇండ్ల జారీ ప్రక్రియను జనవరి 26వ తేదీన లాంఛనంగా ప్రారంభించగా.. మొదటి విడుదతో ఇంటి స్థలం ఉన్న అర్హులకు రూ.5 లక్షల నగదు ఇవ్వాలని నిర్ణయించింది. ఈ మేరకు.. ప్రజాపాలన కార్యక్రమంలో వచ్చిన దరఖాస్తుల ఆధారంగా క్షేత్రస్థాయిలో సర్వే నిర్వహించిన అధికారులు లబ్దిదారుల జాబితాను కూడా సిద్ధం చేసి.. గ్రామ సభల్లో ఇప్పటికే ప్రకటించారు కూడా.

లబ్ధిదారుల జాబితానైతే ప్రకటించారు కానీ.. ఎప్పుడు నిర్మాణం మొదలుపెట్టాలన్నది ప్రభుత్వం స్పష్టం చేయకపోవటంతో ప్రజలు గందరగోళానికి గురయ్యారు. దీంతో.. ఇందిరమ్మ ఇండ్ల నిర్మాణానికి సంబంధింతి ప్రభుత్వం బిగ్ అప్డేట్ ఇచ్చింది. రేపే (ఫిబ్రవరి 21న) ఇందిరమ్మ ఇండ్ల నిర్మాణానికి శంకుస్థాపన చేయనున్నట్టు ప్రకటించింది. శుక్రవారం రోజున సీఎం రేవంత్ రెడ్డి నారాయణపేట జిల్లాలో పర్యటించనున్న విషయం తెలిసిందే. ఈ నేపథ్యంలో.. నారాయణపేట మండలంలోని అప్పకపల్లెలో ఇందిరమ్మ ఇండ్లకు శంకుస్థాపన చేసి.. రాష్ట్రంలో మొదటి విడత ఇందిరమ్మ ఇళ్ల నిర్మాణానికి సీఎం రేవంత్ రెడ్డి శ్రీకారం చుట్టనున్నారు.

కాగా రాష్ట్రవ్యాప్తంగా మొత్తం 72,045 ఇందిరమ్మ ఇండ్లు విడుదల కాగా.. వాటన్నింటికీ రేపు (ఫిబ్రవరి 21న) శంకుస్థాపన పనులు మొదలు కానున్నాయి. ఇల్లు లేని కుటుంబాలందరికీ ఇండ్లు మంజూరు చేయాలని ప్రభుత్వ సంకల్పంలో భాగంగా.. ఇంటి జాగ ఉన్న పేదలు సొంతంగా ఇల్లు కట్టుకునే అవకాశం కల్పిస్తోంది ప్రభుత్వం. ఇంటి నిర్మాణానికి అవసరమయ్యే రూ.5 లక్షల ఆర్థిక సహాయాన్ని ప్రభుత్వం చేయనుంది. ఇంటి నిర్మాణంలో భాగంగా బేస్మెంట్ కట్టగానే రూ.1,00,000 లబ్దిదారుని ఖాతాకి నేరుగా విడుదలయ్యేలా ఏర్పాట్లు పూర్తయ్యాయి.

ఇంటి నిర్మాణానికి అవసరమయ్యే ఇసుకను పూర్తి ఉచితంగా సరఫరా చేయనున్నట్టు ఇప్పటికే ప్రభుత్వం ప్రకటించింది. ఇందుకోసం.. 24 గంటల పాటు స్లాట్ బుక్ చేసుకునేందుకు వీలుగా అన్ని చర్యలు తీసుకున్నట్టు ప్రభుత్వం చెప్తోంది. దీంతో.. పేదల ఎన్నో ఏళ్ల సొంతింటి కల నెరవేరే సమయం రానే వచ్చేసింది.